ទស្សនកិច្ចនិស្សិតសាកលវិទ្យាល័យភូមិន្ទកសិកម្មនៅចម្ការម្រេចខនហ្វីរេល
កាលបរិច្ឆេទ: ០៩ មេសា ២០២៦ / កសិកម្ម / Author : ATH Sokren
នៅថ្ងៃទី២០ ខែមីនា ឆ្នាំ២០២៦ និស្សិតឆ្នាំទី ២ ជំនាន់ទី២៥ នៃមហាវិទ្យាល័យកសិ-ឧស្សាហកម្ម ជំនាញវិទ្យាសាស្រ្តអាហារនៃសាកលវិទ្យាល័យភូមិន្ទកសិកម្មសរុបចំនួនជិត១០០ នាក់បានចុះធ្វើកម្មសិក្សានៅចម្ការម្រេច Confirel ព្រៃថ្នង ក្នុងខេត្តកំពត ក្នុងគោលបំណងស្វែងយល់ពីៈ «បច្ចេកទេសផលិត បច្ចេកទេសប្រមូលផល ការវេចខ្ចប់ និងស្តុកទុកផលិតផលម្រេច»។
លោក ណុល រតនា ប្រធានគម្រោងកសិ-អាហារនៃក្រុមហ៊ុនខនហ្វីរេលតំណាងឱ្យលោកឱសថបណ្ឌិតហៃ លីអ៊ាងប្រធានអគ្គនាយកក្រុមហ៊ុន-សហគ្រាសប៉េប៉េអឹម និងខនហ្វីរេលបានទទួលស្វាគមន៍ដំណើរទស្សនកិច្ចរបស់ក្រុមនិស្សិតនៅក្នុងចម្ការម្រេចខនហ្វីរេលព្រៃថ្នង ជាទីតាំងដែលក្រុមហ៊ុនខនហ្វីរេលមុនគេ ដើម្បីឆ្លើយតបទៅនឹងតម្រូវការទីផ្សារជាតិ និងអន្តរជាតិ។
មុននឹងចុះពិនិត្យដោយផ្ទាល់នៅក្នុងចម្ការម្រេច លោកណុល រតនាបានចាក់បង្ហាញវីដេអូ Company profile របស់ក្រុមហ៊ុនខនហ្វីរេលដើម្បីជាទស្សនទានដល់ក្រុមនិស្សិតដើម្បីជាចំណេះដឹង ហើយបន្ទាប់មកលោកបានពន្យល់ដល់ក្រុមនិស្សិតអំពីទស្សនវិស័យនៃសេដ្ឋកិច្ចវិលជុំរបស់លោកឱសថបណ្ឌិត ហៃ លីអ៊ាង ដែលក្រុមហ៊ុនខនហ្វីរេលបានអនុវត្តដោយជោគជ័យអស់រយៈពេលច្រើនឆ្នាំមកហើយ។
បន្ទាប់ពីបានស្តាប់ការពន្យល់របស់លោកណុល រតនារួចមកនិស្សិតទាំងអស់បានចុះស្វែងយល់ដោយផ្ទាល់នៅក្នុងចម្ការម្រេច ជាមួយនឹងការពន្យល់យ៉ាងក្បោះក្បាយពីប្រធានគ្រប់គ្រងចម្ការម្រេចព្រៃថ្នងរបស់ខនហ្វីរេលទាក់ទងទៅនឹងការដាំដុះ ការថែទាំ ការប្រមូលផល និងការកែច្នៃផ្សេងៗនៅក្នុងទីនេះ។លើសពីនេះទៅទៀតអ្នកគ្រប់គ្រងចម្ការក៏បានលើកឡើងពីបញ្ហាប្រឈមនានាពាក់ព័ន្ធនឹងជំងឺម្រេច និងការបំផ្លាញដោយសត្វល្អិត ហើយគាត់ចង់សាលា ជាពិសេសនិស្សិតទាំងអស់យកទៅសិក្សាស្រាវជ្រាវដើម្បីស្វែងរកដំណោះស្រាយជួយដល់កសិករ៕
